Na’e fakaha ‘e he Sekelitali Seniale ‘a e Kominiueli , Kamalesh Sharma ‘e siofi ‘e he Kominiueli ‘a e Fili ‘a e ‘Otu Solomone ‘a ia ‘e fakahoko ‘i he ‘aho 19 ‘o Novema ,2014.

 

Na’e pehe ‘e Mr. Sharma , ko e Kulupu Vakai Tau’ataina ko eni mei he Kominiueli , ‘e taki atu ai ‘a Sir Mekere Morauta ko e Palemia fuoloa ‘o Papua Niukini. Ko hono ‘oatu ko eni ‘a e Kulupu ni makatu’unga mei he fakaafe mei he Komisiona Fili ‘a e ‘Otu Solomone.

 

“Ko e tangata’ifonua kotoa pe ‘o e Kominiueli ‘i mamani kau ai ‘a e ‘Otu Solomone , ‘oku ‘i ai ‘enau totonu kenau fili tau’ataina ‘o fakafuo mo fakafotunga ‘a e sosaieti ‘oku nau faka’amu kenau nofo ai. Ko e ‘aho 19 ‘o Novema ko e ‘aho ia ke fakahaa’i ai ‘e he toko taha Solomone kotoa pe ‘a ‘ene totonu ke fili tau’ataina mo melino foki,” ko e lau ia ‘a e Sekelitali Seniale.

 

“Ko e fili ni kuo pau ke ‘i he founga melino mo totonu koe’uhi ke ne fakahaa’i ‘a e loto totonu ‘o e kakai ‘o e ‘Otu Solomone. ‘A kinautolu kotoa ‘oku kaunga ki ai – ‘a e sino ‘oku ne pule’i ‘a e fili, kau taki ‘o e ngaahi paati fakapolitikale mo honau kau poupou, ngaahi kautaha le’o mo malu’i, ngaahi kautaha ongoongo, sosaieti sivile pea mo e kakai fili. ‘Oku totonu kenau taki taha fakahoko honau ngaahi fatongia totonu ‘i he ‘aho fili ke fakaha ‘e he founga mo e ola ‘a e mateuteu mo e falala ‘a e toko taha kotoa,” ko e fakaha ia ‘e Sharma.

 

‘E vakai ‘a e Kulupu ki he ‘atakai mo e ngaahi teuteu kotoa pe kimu’a he fili. ‘I he ‘aho fili mo e ‘osi ‘a e fili, te nau vakai ai ki he founga fakahoko ‘o e fili, lau ‘o e fili mo hono tanaki pehe ki hono fakaha ‘o e ola, ke taau mo e maama ‘o e ngaahi tu’unga fakavaha’apule’anga mo fakamamani lahi ‘o e fili fakatemokalati ‘a ia kuo tukupa ki ai e fonua.

 

‘I he fakahoko fatongia ‘a e Kulupu ni te nau tu’u tau’ataina ‘o ‘ikai kau ki ha fa’ahi pe paati pea muimui foki ki he ngaahi tu’utu’uni ‘a ia ‘oku ha ‘i he Tala Fakahaha Fakamamani lahi ki he Ngaahi Founga Ngaue ki he Vakai mo Siofi Tau’ataina ‘o e Fili ‘a ia ‘oku fakamo’oni ki ai ‘a e Kominiueli.

 

‘I he lava ‘enau ngaue, ‘e fakahu atu leva ‘e he Kulupu ‘enau lipooti ki he Sekelitali Seniale ‘o e Kominiueli ‘a ia tene toki tuku atu ‘e ia ki he Pule’anga Solomone, Komisiona Fili ‘a e ‘Otu Solomone, ngaahi paati fakapolitikale, ngaahi pule’anga ‘o e Kominiueli pea ki he kakai foki.

 

‘Oku ‘i Solomone ‘a e Kulupu mei he ‘aho 11 ki he ‘aho 29 ‘o Novema 2014. ‘E tokoni ki he Kulupu ha timi fakaSekelitali ‘a ia ‘e taki ai ‘a Albert Mariner, ko e ‘Ulu ia ‘o e Tafa’aki FakaPolitikale ‘o Kalipiane mo e Pasifiki.

 

“ Oku tukupa ‘a e Kominiueli ki he kakai ‘o e ‘Otu Solomone pea ‘e kei hokohoko atu ‘enau ngaue ke fakamalohi’i ‘a e ngaahi founga ngaue fakatemokalati pea mo e tulitulifua ki he’ene ngaahi kaveinga mo e taumu’a ngaue fakalakalaka ‘o fakatatau ki he ngaahi palani fakafonua pehe ki he ngaahi tefito’i tui mo e founga ngaue ‘a e Kominiueli ‘a ia ‘oku ha pe ia ‘i he Siate ‘a e Kominiueli, pea fengaue’aki fakataha foki mo e ngaahi hoa ngaue ‘o e fonua,” ko e fakamuimanoa ia ‘a e Sekelitali Seniale.

 

Ko e Kulupu Vakai Tau’ataina eni ‘a e Kominiueli ki he Fili ‘a Solomone;

 

Sea: Sir Mekere Morauta, Former Prime Minister, Papua New Guinea

  • Senator Linda Reynolds, Member of Parliament, Australia
  • David Lambourne, Legal Expert, Kiribati
  • Aiman Rasheed, Project Coordinator, Transparency Maldives, Maldives
  • John Hayes, Politician and Diplomat, New Zealand
  • Lydia Faisal, Lawyer and Human Rights Expert, Saint Lucia
  • Leiataualesa Daryl Clarke, Former Assistant Attorney General, Samoa
  • ‘Ofakilevuka Guttenbeil Likiliki, Gender Expert, Tonga
  • Jessica Babihuga Nkuuhe, Gender and Conflict Resolution Expert, Uganda
  • Vera Baird, Former General of England and Wales, United Kingdom.